الرأي رأيك والشورة شورتك

ايه رأيك؟

ها يا جماعة موافقين؟

موافقة ؟
في كافة الشعوب الاخرى والبني ادمين الطبيعيين اما حد بيسألهم عن رأيهم بيقول

"انا رأيي ........"

وفي الشعب المصري

"الرأي رأيك يا باشا والشورة شورتك"
والسؤال اللي بعديه في اي مكان بيكون في ناس رافضين

بس في بلاد العالم التالت

"طبعا موافقين "
والسؤال الاخير

البرلماني

مش هتفرق ردك ايه المهم الاجابة واحدة وهي

" موافقة "
واما حد بيشذ عن النظام اللي ماشي عليه المجتمع عندنا بيحصل حاجة من اتنين

الاول لو في نطاق الاسرة بيعتبر قليل الادب ومترباش
ولو في نطاق الدولة
يبقى امن دولة
انا بس اللي محيرني مش كل دا انا عايزة افهم ايه لازمة السؤال

ديكور مثلا

زي اشارات المرور العطلانة في شوارع كتير

والقانون اللي بيطبق بس على الفقير

والدستور الصوري والمجلس الصوري

بردومفيش حاجة كدا ليها لازمة عندنا!

طيب اما رأينا ملوش لازمة ومش هيفرق مع حد

بتسألونا ليه ؟

ايه رأيكم في الكلام دا طبعا

"الرأي رأيي والشورة شورتي "

اتكلموا

من كام يوم كدا مسكت نفسي في حالة تلبس
واتاكدت ان اركان الجريمة مكتملة وثبت ان انا الجاني
لاقيت نفسي بمارس عادة ادمنها الشعب المصري
عادة ادمنها في عصور الاستبداد والقهر والظلم
العصور اللي استمرت اكتر من عمر الفراعنة
مسكت نفسي في حالة تلبس
اكتشفت اني خايفة
ايوة خايفة
بس مش من الامن بس ومش خوف من اني يتقبض عليا
خوف من المجتمع وتفكيره وعاداته وتقاليده الفاشلة
يعني تروح تشتكي لحد من ظالم
يقولك يا سيدي يا بخت من بات مظلوم ولا بتش ظالم
خوف من ان المجتمع يرفض افعالي وان كانت صح لانها بس بتخاف نظامه
بتخالف العادة اللي اتعود يمارسها
الادمان اللي تعاطاه الاف السنين
بتخاف قانون الرعب والخوف والارهاب اللي اتفرض عليه
واللي هو قبله بردو
بصيت لنفسي في المراية
افتكرت كلامي من سنتين بس
وافتكرت احلامي باني احرر مصر من التخلف
الاجتماعي قبل السياسي
والسياسي قبل الاقتصادي
افتكرت ان حلمي كان اني اثور على المجتمع اللي خلانا نخاف ونترعب
المجتمع اللي قالنا امشوا جنب الحيط
والتقاليد اللي قالتلي انتي بنت اقعدي في البيت
التقاليد اللي قالتلي اسكتي
بلاش سياسة
الكلام ممنوع
عيب ماتعترضيش على كلام بابا
متقوليش لبابا لا
ماتقوليش لاخوكي لا
احترمي مدرسك
واسمعي الكلام
ماتعترضيش
انتي مين عشان تعترضي ولا تقولي لا
اسكتي خالص
مش عايزين صوت
انتي بنت
الكلام ممنوع
عاوزة اقول هنا

لا
لا
لا

وبصوت عالي

هنا بقى

السكوت ممنوع

اتكلموا